Kiyes ki montre'w renmen?

Yo di lanmou se yon emosyon, men pou mwen li plus ke sa. Lanmou se yon repons, yon pouse de santiman. Sa vinn fe definisyon lanmou pou mwen se yon konpòtman aktif. Konpotman sa se pa fèt nou fèt avek li men se aprann nou aprann li.

Depi nou tou piti, sèvo nou ap evolye, l'ap aprann chak jou e absorbe sa li ap we yo, ke se pozitif ou negatif, tout sa nou konnen de lanmou soti nan anviwonman nou. Ke se paran nou nan nivo konesans yo, ke se sosyete nap viv lan, ou ke se media kap explwate nou pou pwop benefis li.

Se yon bagay ki ta dwe fe nou pe, sitou lè nap chwazi moune pou fè vi nou. Kiyès ki te aprann li renmen? Kote foundation lanmou li komanse? Fondasyon ki pou kontinue etabli konpòtman, aksyon, atitid, senpati, responsablite, konfyans, swen de nou.

Kapasite pou nou santi lanmou menm jan ak kapasite nou pou mache, pale, li, oswa jwe. Li nan nou e si peson pat montre nou koman pou nou renmen, si baz la te mal forme li pa tro ta. Nou ka toujou aprann paske lanmou se yon interaksyon dinamic ke nap viv chak jou, chak segond nan vi nou. Minm jan yon mekanik dwe aprann de machine, yon chef dwe aprann de manje, yon moune dwe aprann de kalite ki fome e devlope lanmou. Li aprann intasnyonèlman, avek atansyon nan lekol la vi , paske manke konprann lanmou fe ampil moune ap soufri nan solitid, kè sere e mank satisfaksyon.

Yon moun pa ka bay sa li pa posede. Pou bay lanmou ou dwe posede lanmou.

Yon moun pa ka anseye sa li pa konprann. Pou anseye lanmou ou dwe konprann lanmou.

Yon moun pa ka konnen sa li pa etidye. Pou etidye lanmou ou dwe viv nan lanmou.

Yon moun pa ka apresye sa li pa rekonèt. Pou rekonèt lanmou ou dwe reseptif pou renmen.

Yon moun pa ka gen dout sou sa li vle fè konfyans. Pou fè lanmou konfyans ou dwe konvenki nan lanmou.

Yon moun pa ka admèt sa li pa bay. Pou bay lanmou ou dwe vilnerab a renmen.

Yon moun pa ka renmen sa li pa dedye tèt li a fe. Pou w dedye tèt ou nan renmen ou dwe toujou aksepte grandi nan renmen.

Viv nan kwayans, viv nan esperans, Men si ta gen yon bagay ki ta merite plus viv nan lanmou.